Main Menu

ፍትህ ያሸንፋል!!! አሁንም እንላለን፦ ፍትህ ያሸንፋል!!!

Tsegaye Ararssa

ሃቅን እየቀበረ፥ እውነትን እየሸፋፈነ፥ ጥፋትን እያድበሰበሰ፥ እና ውሸትን አጀግኖ የታሪክ ሸፍጥን አግንኖ የሚሰበክ ባዶ (አንዱን አቅርቦ አንዱን የሚያርቅ፣ ለያውም የአፍ ብቻ የሆነ) የፍቅር ወግ፣ በእውነት ፊት አይቆምም።

ዛሬ ደግሞ መብዛትም፥ መቀነስም ሆኖ የተበየነው ‘መደመር’ የተሰኘ አስማትም፣ የሕዝብ እውነት ፊት ለፊት ሲነገርህ በድንጋጤ በተቀመጥክበት ደርቆ ከመቅረት አላደንህም፤ ወደፊትም አያድንህም።

ጥፋተኛውና በዳዩ እንኳን የማይቀበለው (መድረሻ የሌለው) ይቅርታ ለሥነ-መለኮት ተማሪዎች ወግ ማሳመሪያ (rhetoric) ይሆን እንደሆን እንጂ አገር ለማስታረቅና ለማስተባበር የማይሆን ነገር ነውና ገና ሳትጠየቅ “ይቅር ብለናል!” እያልክ ፍትህንና እውነትን አታድፋፋ። (ዛሬ እንደሆነው ከጭብጭባውና ከሆታው በኋላ እውነት፥ ፍትህ፥ ሃቅ [በኃጫሉ ድምፅ] ፊት ለፊት ሲጋፈጡህ እንዲህ ያለ ባዶ ወግ አያድንህም።)

ሳይጠይቁህ “ይቅርታ አደረግንላቸው” የምትላቸውም ምላሻቸው ምስጋና ሳይሆን በጥፋታቸው እየተኩራሩ መግነን፥ መጋነን መሆኑን ልብ በል።

አድራሻ የሌለው ይቅርታ ይቅርብን፤ ይቅርልን። (ወይም ይለፈን!)

ይሄ ትርጉም-አልባ ‘መደመርህንም’ አይጠቅምምና በጊዜ ቦታ አስይዘው።

በፈቃደኝነት የሆነ መተባበርን (voluntary association) እና መርህ ለይ የተመሠረተ አጋርነትን (principled solidarity) ለመግለፅ ከሆነ ሌላ (የተሻለ) ቋንቋ ፈልግ። አታጣም። ፅንሰ-ሃሳብም (concept)፥ ርዕዮትም (ideology)፥ ፍልስፍናም ያልሆነ ቃል ጥሩ መፈክር (moto) አይሆንም። ለፖለቲካህም የተግባር መመሪያ ለመሆን የሚያስችል ይዘት የለውም።

ችግሩ ግን (እኔ እንደሚመስለኝ) የቃላት እጥረት ሳይሆን የሃሳብና የራዕይ እጥረት ከሆነ፣ በጥሞና እራስንና ልብን መፈተሽ ይሻላል፤ ያዋጣልም። ራዕይ ካለ፣ ሃሳብ ካለ፣ መሪ ቃል አይጠፋምና።

ራዕይህ የኋልዮሽ የመሄድ ናፍቆት የወለደው ከሆነ ደግሞ፣ “መደመር” ምናምን እያልክ ከምትቸጋገር “አንድነት!”፥ “ኢትዮጵያ ትቅደም!”፥ ወዘተ ስላሉ የተሻለ ሊያገለግሉህ ይችላሉ።

የውሸት የሆነ ፍቅር፥ ከአንገት በላይ የሆነ ፍቅር፣ አያሸንፍም፤ አላሸነፈም። ትናንት ማታ እንዳየነው ከሆነ አንገትህንም ቀና ለማድረግ አላስቻለህም።

ዛሬም፥ ነገም፥ ሁሌም ፍትህ ያሸንፋል።

እውነትና የሕዝብ ሃቅ ያሸንፋል።

Tsegaye R. Ararssa

Tsegaye R. Ararssa

I like to die teaching. ...Living on the edge, exploring the borders... in self-estrangement...on exile... never too grounded physically or epistemically...always coming, always longing to arrive...ever in love with words...trying to find voice in/through them...trying to make sense,...ever trying to see the light, and to comprehend the same, and to find utterance...to enchant. ...and more...for there is always more in/to life...And the EXIT, yes, the Exit. Perhaps relief at last, arrival, ... finally, in and through EXIT...
Spread the news
  • 803
    Shares


Leave a Reply

Your email address will not be published. Required fields are marked as *

*