Main Menu

የመከላከያ ሰራዊት በአምቦ ነዋሪዎችን መግደላቸው እና ማቁሰላቸው ተሰማ

የአስቸኳይ ጊዜ አዋጁ በሚያጨቃጭቅ ሁኔታ እንደፀደቀ ከተነገረ  በኋላ በተለያዩ የኢትዮጵያ ክፍሎች ተቋውሞ እና የህዝብ አመጽ ማገርሸቱ እየተነገረ ይገኛል። አዋጁን በመቃወም በአምቦ፣ጊንጪ እና በወለጋ የህዝብ እምቢተኝነት እየተስተዋለ እንደሆነ እና የአስቸኳይ ጊዜ አዋጁ እየተጣሰ እንደሆነ ምንጮች ገልፀዋል። በአምቦ የመንግስት የመከላከያ ሰራዊት በህዝቡ ላይ በወሰዱት እርምጃ ህይወታቸው ያለፈ ነዋሪዎች እንዳሉ መረጃዎች ያመለክታሉ።

የአምቦ ከተማ ነዋሪ ሶስት ሰዎች መገደላቸውን አረጋግጠናል ሲሉ ለዶይቼ ቬለ ተናግረዋል። “እኛንም አባረውን ነው ሸሽተን የገባንው። በጣም እየተኮሱ ነው። ወደ ልጆች ነው የሚተኩሱት። እንደ በፊቱ ወደ ላይ እንኳ አይተኩሱም። ወደ አምቦ በተሽከርካሪ የገቡ የመንግስት ወታደሮች በከፈቱት ተኩስ ይህ ዜና እስከ ተጠናከረበት ሰአት በትንሹ 4 ነዋሪዎች ህይወታቸው እንዳለፈ ተሰምቷል።

በመከላከያ ሰራዊቱ እርምጃ የተጎዱ በርካታ ነዋሪዎች ወደ ሆስፒታል እንደተወሰዱ እና ህክምና እንዲያገኙ ጥረት እየተደረገ እንደሆነም ዘገባዎች ያመለክታሉ። በሁኔታው ቁጣው የገነፈለው ነዋሪ በመከላከያ ሰራዊት ተሽከርካሪ ላይ እርምጃ በመውሰድ ተሽከርካሪው በእሳት ነዶ ከጥቅም ውጭ እንደሆነም ተነግሯል።

የህዝብ ተወካዮች ምክር ቤት የአስቸካይ ጊዜ አዋጁን እንዲያፀድቅ በተደረገው የድምጽ ቆጠራ በሚያምታታ እና በተጭበረበረ መንገድ አዋጁን እንዲፀና መደረጉ ከፍተኛ ተቃውሞ ማስነሳቱ ይታወሳል።

የኢትዮጵያ የሕዝብ ተወካዮች ምክር ቤት የአስቸኳይ ጊዜ አዋጁን ትናንት ማጽደቁን ከተሰማ በኋላ የአምቦ ፣የጊንጪ በተጨማሪ በወለጋ ከተማ ነዋሪዎች አደባባይ መውጣታቸውን የተናገሩ የአይን እማኝ መንገድ መዘጋቱን፣አንድ ተሽከርካሪ መቃጠሉንም ተናግረዋል። ከምሽቱ አንድ ሰዓት ገደማ የጸጥታ አስከባሪዎች ከሁለት አቅጣጫዎች ወደ አምቦ ከተማ መግባታቸውንም አክለው ገልጸዋል። ተቃውሞው ቅዳሜ ጠዋት ቀጥሎ እንደነበር የሚናገሩት የአይን እማኙ “የመሣሪያ ተኩስ በየደቂቃው እንሰማለን” ብለዋል። “የሞቱ ሰዎች አሉ” የሚል ወሬ መስማታቸውንም ለዶይቼ ቬለ አስረድተዋል።

በትናንትናው ዕለት በጊንጪ ከተማም የአስቸኳይ ጊዜ አዋጁን የሚቃወም ሰልፍ እንደነበር አንድ የከተማይቱ ነዋሪ ተናግረዋል። ነዋሪው እንደሚሉት የጊንጪው ተቃውሞ በትናንትናው ዕለት 10 ሰዓት አካባቢ ጀምሯል የሚሉት ነዋሪ “ኮማንድ ፖስቶች የሚያርፉበት ቦታ ተቃጥሏል። አራት ቁጥር የመንግሥት መኪና ተገኝታ መግቢያው አካባቢ ተቃጥላለች” ሲሉ አስረድተዋል። የጊንጪው ነዋሪ እንደተናገሩት ተቃዋሚዎች “ከዚህም በፊት ተቀብለን የደረሰብን ነገር ስላለ ኮማንድ ፖስት አንቀበልም” ብለዋል።

 

Spread the news
  • 216
    Shares


Leave a Reply

Your email address will not be published. Required fields are marked as *

*