Main Menu

ማንነት የጥቃት መንስኤ ሊሆን አይችልም

ማንነት (identity) የጥቃት መንስኤ ሊሆን አይችልም

ለኢትዮጵያውያን፣

ማንነት (identity) የጥቃት መንስኤ ሊሆን አይችልም ብዬ አምናለሁ። ለምሳሌ ለፃታዊ ጥቃት (GBV) ፣ ወንድነት በራሱ መንስኤ አይደለም፣ ችግሩ ወንድ ከመሆን ጋር አይደለም። ነገር ግን አንድ ወንድ ለፃታዊ እኩልነት ያለው የተሳሳተ አመለካከት ለፃታዊ ጥቃት መንስኤ ነው። መፍትሄውም እውቀት እና የአመለካከት ለውጥ ይሆናል ማለት ነው።

የሀይማኖት ማንነት በራሱ የጥቃት ምንጭ አይደለም፣ ክርስትያን ወይንም ሙስሊም አማኞች መኖራቸው ለሰላም ማጣታችን መንስኤ ሊሆኑ አይችሉም። ነገር ግን እምነታችንን ልናስከብር የምንሄድባቸው መንገዶች የተሳሳቱ ሊሆኑ ይችላሉ።

በሰሞነኛው የብሄር ጉዳይም እንደዛው፣ የብሄር ማንነት (ethnic identity) ልዩነቶች፣ ለብሄር ጥቃት መንስኤ ሊሆኑ አይችሉም፣ ሆነውም አያውቁም። ኦሮሞቴ ሌሎችን እንድጠላ፣ ሌሎችን ከሰፈራቸው እንዳባርር ምንጭ ሆኖ አያውቅም። ይልቁንም «መብቴን ማስከበር የምችለው ጉልበት ካለኝ ብቻ ነው» የሚለው አመለካከት የችግሮች ሁሉ ምንጭ ሲሆን አይተነዋል። ማንነትን መሰረት ያደረጉ ጥቃቶችን መንስኤ፣ ተሸክመን የምንዞረው የየግል ጭንቅላታችን እና የምንተዳደርበት ስርአት (system) ነው ብዬ አስባሁ። ኦሮሞነት፣ አማራነት፣ ጋሞነት፣ ትግሬነት መኖሩ በራሱ የብሄር ጥቃት መንስኤ ሆኖ አያውቅም። ነገር ግን «ሌሎችን በመጨቆን እና በማጥቃት እራስን ማስከበር» የሚለው አመለካከት የችግሩ ምንጭ እንደሆነ ሊታሰብ ይገባል።

ለብሄር ጥቃት መፍትሄው፣ የብሄር ማንነትን ማደብዘዝ ነው ብለው የሚያምኑ ሰዎችን ሀሳብ ለመግዛት እቸገራለሁ። የብሄር ማንነት እስካለ ድረስ ግጭቱ አይቆምም፣ በሚሉት ሀሳቦች የማልስማማውም ለዚህ ነው። እንደኔ እንደኔ ብዙ ማንነቶች ባለቤት መሆን፣ የአንድን ሀገር ትልቅነት ያሳያል ብዬ አስባለሁ።

የብሄር ማንነትን እንደ ሀገራዊ ስጋት አይቶ ለማደብዘዝ መሞከር፣ ዘላቂ መፍትሄ ነው ብዬ አላምንም። ምክንያታዊነት እስካልነገሰ ድረስ፣ ሰው ሌላ አዲስ ማንነት (identity) ፈጥሮ ጥቃት ማድረሱ አይቀሬ ነው (የሰሞኑ እኔ ሸነግ ነኝ፣ አንቺ ገጠሬ ነሽ የሚለውን አዲስ ፈሊጥን ይጨምራል)። እሱ ካልተሳካ ደግሞ የቀይ ዳማ፣ ቀይ፣ ጠይም እና ጥቁር በሚል የቆዳ ቀለማችን ማንነት ፈጥረን፣ ጥቃቱ ሊቀጥል ይችላል። አደጋው ያለው በማንነት ልዩነቶቻችን ውስጥ ሳይሆን፣ በአመለካክት እና በስርአት ውስጥ ነው።

ለዚህ ስርአትን ማሻሻል ላይ መረባረብ ይኖርብናል፣ ለዚህም መልካም ጅምር ይዘናል ብዬ እስበላሁ። ስርአቱ ሚዛናዊነትን፣ እኩልነትን፣ ነፃነትን፣ አካታችነትን መርህ ቢያደርግ፣ ግለሰቦች ደግሞ ምክንያታዊነትን፣ አርቆ ማሰብን፣ መከባበርን፣ መደማመጥን እንደ ማህረሰብ ብንላበስ፣ ያኔ የማንነት ልዩነት እንደ አንድ የሀገር ስጋት ሳይሆን፣ እንደ ሀብት ይቆጠራል እላለሁ።

 

 

 

 

 

Siyane Aniley Amentie

Siyane Aniley Amentie

Siyane Aniley is a lecturer, trainer, researcher and gender equality activist. She is doing her PhD at AAU, department of Comparative and International Education.
Siyane Aniley Amentie
Siyane Aniley Amentie

Latest posts by Siyane Aniley Amentie (see all)

Spread the news
  • 70
    Shares


Leave a Reply

Your email address will not be published. Required fields are marked as *

*